ភ្នំពេញ៖ អគ្គសេនាធិការ និងជាអនុរដ្ឋមន្ត្រីការពារជាតិវៀតណាម លោក ង្វៀន តឹនគឿង បានជម្រាបនាយករដ្ឋមន្ត្រីកម្ពុជាថា យោធាវៀតណាមនិងចូលរួមជាមួយកងទ័ពកម្ពុជានៅតាមព្រំដែន ធ្វើកិច្ចសហប្រតិបត្តិការនៅតាមតំបន់ព្រំដែនកម្ពុជា-វៀតណាម ធ្វើយ៉ាងណាឱ្យតំបន់ព្រំដែនជាតំបន់មានសុខសុវត្តិភាពដល់ពលរដ្ឋទាំងពីរប្រទេស។
ថ្លែងក្នុងជំនួបជាមួយនាយករដ្ឋមន្ត្រីកម្ពុជា សម្ដេចតេជោ ហ៊ុន សែន នៅវិមានសន្ដិភាពនាព្រឹកថ្ងៃសៅរ៍ ទី១៩ ខែមីនា ឆ្នាំ២០២២នេះ លោក ង្វៀន តឹនគឿង បានកោតសរសើរដល់យុទ្ធនាការចាក់វ៉ាក់សាំងកូវីដ-១៩ របស់កម្ពុជាដែលបានធានាដល់ការបើកប្រទេសឡើងវិញលើគ្រប់វិស័យនៅពេលនេះ។ លោកក៏បានកោតសរសើរនូវការរៀបចំកិច្ចប្រជុំយោធាអាស៊ានដែលកម្ពុជាបានរៀបចំនៅពេលនេះផងដែរ។
ចំពោះកិច្ចការព្រំដែនវិញលោក ង្វៀន តឹនគឿង បានជម្រាបប្រាប់សម្ដេចតេជោថា កងទ័ពកម្ពុជា-វៀតណាម និងរៀបចំកិច្ចប្រជុំនៅព្រំដែន ពង្រឹងមិត្តភាពពង្រីកកិច្ចសហប្រតិបត្តិការ លើកិច្ចការពារជាតិ បង្កើតលេខពិសេសរួមគ្នាដើម្បីដោះស្រាយរាល់បញ្ហាដែលអាចកើតមានឡើងឱ្យទាន់ពេលវេលា ហ្វឹកហាត់ការស្រាវជ្រាវនិងសង្គ្រោះបន្ទាន់ រួមទាំងការចែករំលែកព័ត៌មានដើម្បីរក្សាសន្ដិភាព សន្ដិសុខនៅតាមព្រំដែន។
ជាការឆ្លើយតបសម្ដេចតេជោ បានស្វាគមន៍ និងលើកទឹកចិត្តដល់កងទ័ពទាំងពីរបន្តកិច្ចសហប្រតិបត្តិការដូចដែលលោក ង្វៀន តឹនគឿង បានលើកឡើង និងស្វែងរកកិច្ចសហប្រត្តិបត្តិតការណ៍ដទៃទៀតដែលអាចធ្វើបានដើម្បីធ្វើយ៉ាងណាឱ្យព្រំដែនក្លាយជាកន្លែងមានសុវត្ថិភាព និងសន្ដិភាពនៅតាមព្រំដែន។
ជំនួយការនាយករដ្ឋមន្ត្រីគឺលោក អ៊ាង សុផល្លែត បានប្រាប់ក្រុមអ្នកយកព័ត៌មានថា៖ «សម្ដេចថ្លែងថាធ្វើយ៉ាងណាឱ្យតំបន់អតីតសមរភូមិក្លាយជាទីតាំងមានការអភិវឌ្ឍ សន្ដិភាព និងមិត្តភាព»។
សម្ដេចក៏បានប្រាប់លោកអនុរដ្ឋមន្ត្រីការពារជាតិវៀតណាមពីយុទ្ធសាស្ត្រចាក់ស្រោចវ៉ាក់សាំងរបស់កម្ពុជា និងភាពជោគជ័យក្នុងការបើកទទួលភ្ញៀវទេសចរណ៍មកកម្ពុជាដោយលែងមានលក្ខខន្តតម្រូវផងដែរ៕
